Urdhrat që lëshojnë Gjykatat ndaj personave të cilët kanë kryer dhunë në familje jo gjithmonë respektohen dhe për pasojë vepra përsëritet e madje përfundon edhe tragjikisht, siç ndodhi me rastin e gruas shtatzënë që u vra nga ish-bashkëshorti i saj, raporton Gazeta Sinjali.
Mbrojtje nga Policia ka kërkuar edhe një grua në Malishevë, e cila është e pajisur me urdhër mbrojtës dhe është në procedura divorci me bashkëshortin e saj. Ajo po përballet me dhunën psikike që ai dyshohet se po ia shkakton, duke e kërcënuar edhe me vrasje.
Burimet nga Prokuroria ka bërë me dije se i dyshuari e ka akuzuar bashkëshorten se po del me disa persona gjatë natës, duke kërkuar kështu strehim për të. Në të kundërtën, ai ka deklaruar para zyrtarëve policorë se “ose e mbys veten ose atë”.
Pasi janë intervistuar dy palët, Prokurori i Shtetit ka urdhëruar ndalimin e personit të dyshuar, ndaj të cilit është iniciuar rasti për veprën penale “Dhunë në familje”.
Ndryshe, masa mbrojtëse e ndalimit të afrimit viktimës së dhunës në familje si dhe vartësit të tij/saj dhe personave tjerë nëse është e nevojshme, mund t’i shqiptohet personit i cili ka kryer dhunë në familje, nëse ekziston rreziku i përsëritjes së dhunës në familje
