Kryeministri i Shqipërisë, Edi Rama, në fund të fjalimit të tij e ka përmendur LDK’në dhe UÇK’në, që sipas tij, pa to “nuk mund të kuptohet ardhja deri në këtë ditë e as vazhdimësia përtej kësaj ditë”.
Ai tha se Rugova u nda nga jeta para kohe, por me mision të kryer, ndërsa shtoi se Thaçi u nda përkohësisht në një mision që vazhdon.
“Dy emra do të sjellë këtu në vëmendje, pa të cilët nuk mund të kuptohet dot, as ardhja deri në këtë ditë dhe as vazhdimësia përtej kësaj dite – Lidhja Demokratike e Kosovës dhe Ushtria Çlirimtare e Kosovës dhe të dyja këto natyrisht lidhen me Ibrahim Rugovën,
një i munguar i madh sot, pasi u nda nga jeta para kohe por me mision të kryer dhe Hashim Thaçin, një tjetër i munguar i madh sot në këtë sallë, i cili është i ndarë prej nesh përkohësisht, në një mision që vazhdon”, ka thënë Rama në mbledhjen e përbashkët të dy kuvendeve Kosovë-Shqipëri.
Rama theksoi Kosova nuk do të presë gjatë për njohjen përfundimtare aq sa ka pritur për të shpallur pavarësinë.
“Unë besoj se edhe njohja e saj përfundimtare do të vijë më herët sesa vonë dhe se Kosova nuk do të presë kaq sa ka pritur qysh se ka shpallur pavarësinë për t’u njohur përfundimisht, ndërkombëtarisht dhe për të qenë e pranishme në çdo instancë të gjithë organizimit të përgjithshëm të botës ku ne jetojmë”, tha Rama.
Shefi i ekzekutivit të Shqipërisë tha se “mbase kjo ditë festive nuk duket e duhura” por insistoi se kjo “nuk mund të lihet” pa u thënë.
“Do të doja të sillja në vëmendje një fakt që mua s’më ka rënë rasti ta them, por as s’kam pasur rastin ta dëgjojë të thuhet. Mbase kjo ditë festive nuk duket e duhura… Por sot, pikërisht sot, nuk mund të lihet pa kujtuar se historia jetësore e atyre 40 firmëtarëve të pavarësisë përshkruhet nga funde tragjike”, tha kryeministri shqiptar.
